Musig im Chopf

gs Heit dir das o scho erläbt, dass nech e Melodie stundelang im Chopf isch umetrolet?
Dir chöit mache, was dir weit: Immer wider fingt si dr Wäg i öi Hirnwindige
u lat das Stück innerlech unändlech la erklinge.

Genauso isch’s mir nach üsem erschte Wiehnachtskonzärt ergange.
Die schöne Wiehnachtsmelodie hei mir die ganzi Nacht nid i Rueh gla!
Es grosses «Christmas Festival» het i mim Chopf stattgfunge.
Da glüüsslet dr «Little Drummer Boy» churz «Over the Rainbow»
und erblickt dört änä e wunderschöne «White Christmas».
Di Eländä us em Roman vom Victor Hugo, «Les Miserables»,
marschiere «March OP99»-mässig dür d Stadt u wei d «Conquest of Paradise» auso:
d Eroberig vom Paradies.

Öb’s äch der «Nussknacker» schafft, di «3 Nüsse für Aschenbrödel» z knacke?
Villecht glingt’s ihm mit Hiuf vom Owi, wo z’fride i di «Stille Nacht» ine lachet.

U was ghöri de da?? Genau so wi färn, auso «Last Christmas»,
ertönt e «Sweet Bells Fantasy» i süesse Zuckerwatte-Gloggetön.
Jetz bini z’Grächtem ir Wiehnachtszyt acho.
Dir o? Wenn nid, de chömet nächscht Sunnti, am 8. Dezämber, i d Markus-Chile.
Es lohnt sech! Das hei üs o di zahlriiche Bsuecher ir Nydegg-Chiuche bestätigt.
U o mir hei extrem Fröid a üsne schöne Stück.

U we dir chömet, chöit dr no grad üse nöi Dirigänt lehre kenne.

Auso: bis gli …. Öi Mettere